ދިވެހި ކަނޑުފަޅުތަކުން ދިވެހިރާއްޖެ ތަރައްޤީކޮށް ކުރިއެރުވޭނެއެވެ
Posted: Friday, September 13, 2013 by samaahath in Labels: މަޒުމޫނު
0
ޒަމާނުންސުރެވެސް އަޅުގަނޑުމެންގެ ރާއްޖެއާމެދު ދެކެމުން އައިސްފައިވަނީ ޤުދުރަތީ ވަޞީލަތްތައް މަދު، އިޤްތިޞާދީގޮތުން އުފެއްދުންތެރިކަމެއްނެތް ޤައުމެއްގެ ގޮތުގައެވެ. ނަމަވެސް ހަޤީޤަތަކީ މި ޤައުމަކީ ކަނޑުފަޅުގެ މުއްސަނދިކަން އޮތް، ނުވަދިހަ ނުވަ އިންސައްތަ ކަނޑުފަޅުގެ ގޮތުގައި ހިއްސާކުރާ ޤުދުރަތީ ވަޞީލަތްތައް ހުރި ޤައުމެއްކަމެވެ. އެހެންނަމަވެސް މި މުއްސަނދިކަމުގެ ފައިދާނެގުމަށްޓަކައި ބޭނުންވަނީ ޢިލްމާއި ޙިލްމެވެ. އަދި ބޮޑު ހޭދައެކެވެ. އެގޮތުން މޫދު ލޮނުން ތަފާތު މާއްދާތައް ނެގުމާއި ކަނޑުގެ ދިރުންތަކާއި އެއިން އުފައްދާތަކެތި ބޭރުކުރުމާއި ކަނޑުގެ އެންމެ އަޑީ ފަށަލައިން މަޢުދަންތައް ނެގުމާއި ފަތުރުވެރިންނަށް ކަނޑުފަޅުތަކުގެ ރީތިކަން ދެއްކުން އަދި ފެނުން ހަކަތަ އުފެއްދުން ފަދަ އެތަކެއް ބޮޑެތި މަޝްރޫޢުތަކެއް ހިންގިދާނެއެވެ. މިފަދަ އިންޑަސްޓްރީތައް އުފެދުމުގެ ސަބަބުން ވަޒީފާގެ ފުރުސަތުތައް އިތުރުވެ ބޭރުފައިސާ ޤައުމަށް ވަންނަ މިންވަރު އިތުރުވެގެންދާނެއެވެ. ނަތީޖާއެއްގެ ގޮތުން ޤައުމު ތަރައްޤީވެ ކުރިއަރައިގެންދާނެއެވެ.